جوزي عايز يصحيني كل يوم الساعة 6 الصبح

[المحتارة]

خطيبى بيشتغل وشغله ٧الصبح قالى لما اتجوزك هتصحى ٦عشان تأكلينى فأنا عارفة انى مش هعرف اقوم الوقت ده بدرى اوى فكل اما نتكلم نهزر ونضحك واقوله هتسبنى نايمة برضو لكن اخر مرة اتكلمنا واتس قالى هتقومى غصب عنك ورينى ازاى مش هتقومى دلوقتى انا متضايقة أنه عايز يصحينى بدرى اوى وعارفة نفسي انى مش هعرف ومتضايقة أنه بيتكلم بشدة ومصر اوى وانا عمالة أقوله دلعنى وسبنى نايمة عشان اكون فايقة لبيتنا بعد كدة يقولى لا اعمل اى اى الصح الى اعمله أو اتكلم معاه وأقنعه برأى ازاى

 

[شيكولاتة بالمستكة]

بصي يا حبيبتي الجواز مش دلع بس اللي اهم من كده الجواز مسئولية
لازم تكوني قدها
ونظام حياتك وانتي بنت وفي بيت اهلك
غير نظام حياتك مع زوجك
وبعد كده ان شاء الله مع اولادك
وصحيان بدري لمداسهم وامتحانتهم

عادي انه يطلب تصحي بدري تفطريه بالعكس ده هيعمل ألفة جميلة بينكم
وبعد ما يمشي نامي تاني او لو خلصي بسرعة شغل البيت ونامي

ربنا يسعدكم ويفرح قلبكم

 

[utobia]

انا مع شيكولاته وبلاش تدخلي مع خطيبك في حاجات توصل للعند من اولها

 

[Fanta]

على فكرة دى مش مشكلة هايفة ، انا اخويا متجوز بقاله سنتين ودى مشكلة مستمرة عندهم للأسف تبان هايفة لكن معكننه عليهم
فلازم تتفقو عليها ربنا يسعدكم

 

[Mariam MOo]

بعد الجواز الامور هتتظبط معاكى ان شاء الله ....لان الجواز مسئوليه قبل مايكون اى حاجه تانى ...وانتى نامى بدرى واصحى بدرى عشانه .....او اسهرى عاادى واصحى الصبح جهزيله الفطار ونامى بعد مايمشى .......انتى متحطيش فى دماغك انك مش هتقدرى تصحى والكلام دا.....انا اختى قبل الجواز كان نومها تقيل جدا وكانت بتنام بال١٢ ساعة دلوقتى بقالها سنه متجوزه تقريبا ونومها بقى خفيف اووووى ...لان هى برضوا مظبطه مواعيد نومها على شغل جوزها وعلى مواعيد تحضير الاكل وعلى شغلها