جوزى مدرس واللى بيحصل مع البنات فى اوضة الدروس الخصوصية

المحتارة

فتوكة ونص
فتكات المحتارة
انا متجوزه من تلات سنين وعندى 27 سنه وجوزى اكبر منى بست سنين

اتجوزنا جواز مش صالونات اوى ومش مغامرات يعنى
جوزى مدرس وكان بيدى لاخويا وهو فى اعدادى درس خصوصى فى البيت
شافنى وشوفتوا واعجب بى وعجبنى (وسيم ولبق ورياضى وكريم ومجامل وكدا يعنى .... الحاجات اللى بتعجب البنت فى العريس، انا معنديش طلبات خاصة فى العريس، وانا متوسطة الجمال)
اتكلمنا واتعرفنا على بعض بعلم البيت وبعد شهر كنا مخطوبين وبعدها اتجوزنا

مرتبى الصغير من شغلى المؤقت على مرتبه على الدخل اللى جايه له من فلوس الدروس كنا عايشين ومستوره
مرتبى على مرتبه يا قصروا يا يادوب يكفوا ندفع بيهم ايجار الشقة على فواتير الغاز والكهربا والتليفون والمواصلات
وعايشين على الدخل الاضافى من الدروس وهو بيحاول يسافر للخارج ومش سايب فرصة
كل حاجه تمام لحد ما السنه دى اترقى من مدرس اعدادى لمدرس ثانوى، واتنقل من المدرسه اللى هو فيها لمدرسة ثانوى بنات

لسه ما كنش معروف فى المدرسه الجديده، فالدروس كانت قليله السنه دى ودا اثر على دخلنا
هو كان بيبذل مجهود خرافى فى المدرسه عشان الطلبة تعرف انه شاطر وتيجى تاخد عنده درس
وبدأت تيجى مجموعات تاخد عنده درس ، عشان عنده فى المدرسه مفيش مدرسين بيروحوا يدوا دروس للطلبة زى اعدادى، الطلبة بتيجى للمدرس فى البيت
وان المجموعات تيجى له فى البيت كان مريحنى وكنت مبسوطه
لانه بين المجموعات بيتغدى معايا، ممكن يريح 10 دقايق، يشرب كباية شاى، لو مجموعة اتلغت، اهو قاعد معايا بدل ما كان بيقعد على القهوة

وعشان هو فى مدرسة بنات فالمجموعات طبعا كلها بنات
فى الاول مكنتش مركزه فى الدروس بتاعته ولا فى البنات مين داخل ولا مين طالع
هما بيجمعوا نفسهم ويطلعوا مع بعض ويمشوا مع بعض

لاحظت ان فى البنات المفاعيص اللى فى ثانوى مع الصيف لابسين لبس زى الزفت اللى وشهم وهما جاين الدرس
مش حاجات كلها شيك او غاليه وماركات لكن القصير فوق الركبه وفتحة من ورا (شوفوا لما تقعد ولا تحط رجل على رجل او وهى قايمة هيبان منها قد ايه) والضيق والشفاف من فوق ومن تحت وحاجه قرف
غير المكياج والبرفان والضحك الرنان والهزار والولا كانهم جايين فرح
ويا ريت مفاعيص، دا فيهم بنات عرايس قمرات بياض طول وعرض اطول واعرض منى وملفوفين
وبعدين بيغيروا من بعض
يعنى وحده فى مجموعه لابسه قصير، الحصة اللى بعدها تيجى المجموعه كلها لابسه قصير
مكناش كدا واحنا صغيرين
ولا حتى وانا كبيره ممكن البس حاجه زى دى

بصراحه الموضوع دا كان مضايقنى خالص ومش عارفه اعمل ايه وغيرانه موت بس مش عارفه اعمل ايه
كلمت جوزى فى الموضوع دا، وقالى البنات فى السن دا بتغير من بعض، ويعنى هاعمل لهم ايه؟
ماقدرش اعلق على لبس اى وحده فيهم، البنات فى السن دا ممكن تفهم غلط انى غيران عليها مثلا،
وبيتكلموا مع بعض ويالفوا قصص وروايات ويغظوا بعض ان الاستاذ غيران على وقالى كذا وكذا، وعندنا فى المدرسة فضايح من لا شيئ بسبب حاجات زى كدا

فى مجموعات بتيجى بابقى قاعده على نار ، وقولتله اقعد معاك فى الحصة، قالى هابقى اضحوكه وهيمسخرونى فى المدرسه
والبنات بجد من نظراتها باحس ان فيهم بنات سوس وعقارب وعايزه قطم رقبتها
مره دخلت له الشاى وكان فى بنت فى المجموعه هاتنقط منها من اللى عملاه فى نفسها ولبسها
البنت بتبصلى بطرف عينها كانى ضرتها، وتتدلع على جوزى وتقوله خليك معايا مش فاهمة الحته دى تقوله بصلى وبايدها تخبط على ايده وتقوله يا استاذ مش فاهمه الحته دى وتبصلى وتضحك ضحكة صفره

كنت شيطه ، واليوم دا اتخانقنا وقالى ما تدخليش اوضة الدرس تانى
وانهم زودوها لما دخلتى عشان يضايقوكى
وان فى بنات عقارب بيحبوا الازى

بقيت احط كرسى وابص كدا من فوق الباب فى فتحة صغيره
البنات بتتدلع على جوزى بطريقة مستفزه لدرجة ممكن توصف بالت**********
ولو وحده عملت حاجه لازم كلهم يعملوا زيها باستهبال

يعنى لو وحده خبطت على دراعه وقالت له لو سمحت اشرح لى الحته دى، كلهم بعد شويا لازم يعملوا زيها
لو وحده اتصلت سالته فى حاجه، بعد شويا لازم باقى المجموعه تتصل وكأنها بتقولهم عشان تغيظهم انها كلمت الاستاذ على الموبيل
وحده كانت قاعده فى الكرسى اللى جنيه وهى خارجه رجع لها بالكرسى بتاعه عشان تعدى
كلهم عدوا من قدامه، حتى اخر وحده من الناحيه التانيه لفت حولين التربيزه كلها عشان تعدى زيهم
ومواقف زى دى كتيررررررررررر، وما خفى كان اعظم عشان اكيد مشفتش كل حاجه، غير فى الاجازة زى دلوقت بيكون المدرسين والطلبه اجازهن ففى مجموعات بتبقى الصبح والضهر قبل ما ارجع من الشغل

حاجه تجنن وتحرق الدم ومش قادره اتكلم معاه واقوله اللى باشوفه عشان هو ممكن يسد الباب او يدى دروس فى مكان تانى بره
لكن اقعد اقرره لحد ما يحكى لى موقف مثلا، ويقولى دى عيال وحركات عيال سيبك منهم

حياتى بقت جحيم ونفسيتى اتاثرت وبقت زى الزفت وبقيت عصبية جدا ومش مستحمله وبدأت اخد مهدئات عشان بسبب العصبية المشاكل بينا زادت

اعمل ايه فى مصيبتى دى اللى خايفه تتطور
عشان فى بنات من شكلها وتصرفتها وسلوكها عندها استعداد تعمل علاقات
 

Mariam MOo

فتوكة ونص
والله انا مش متخيلة إلى بتتكلم فيه أنا لسه خارجة من ثانوى ومعايا صحاب كتييييير اووووى فى ثانوى ....واحنا مستحيل نعمل كدا ...وهو كأستاذ محترم المفروض يقولهم إلى هيجى يجى بلبس المدرسة أو لبس محترم ...واعذريه هو برضو ممكن يكون خايف ع مصروف البيت مثلا او على الدخل بتاعكم ..وانتى حاولى تلبيسى حلو ف البيت بحيث انك متدهوش فرصة يبص برا اصلا ....وانتى اكتر واحدة تعرفى جوزك طريقة التعامل معاه ازاى لو انتى تقدرى انك تخليه يمشى المجموعة دى وتتحمل نقص فى دخل البيت فأقنعيه بكدا ...ربنا ييسر لك امورك
 
قلبي معاكي والله صعبانه عليا حالك ده ماتتمنهوش اي زوجه خالص
ربنا يصبرك بجد
بس ده شغله فعلا هاتعملي ايه
بغض النظر انه تواجده مع بنات فقط ف مكان مقفول ده غلط حتي لو بيشرح
يعني اقترحي عليه يجيب ولاد مثلا
هو ماينفعش يدي دروس لولاد من مدارس تاتيه !
بصراحه الله يكون في عونك بس هارجع واقولك انتي كبيرة عاقله ناضجه
انتي وجوزك اكيد
ومدام هو شخص محترم وانتي بنفسك من ورا الباب بتشوفي انه مابيتلككش لواحده ولا بيهزر ولا بيمد ايده ولا بتاع حركات يبقي حاولي ماتسلطيش الضوء اوي علي الحوار ده
لانه هايشوف اد ايه انتي غيرانه منهم وان مراتي ليها حق تغار لانها بتكبر
انتي مش عارفه الشيطان هايدخله من اي باب علشان يخرب بينكم
مهما كان شغل جوز الواحده فيها بنات
هايفضل الراجل بيحب اللي بتقدر شغله
اللي دماغها مش تافهه
من وجهة نظرهم طبعا
اعملي اللي هاقولك عليه
حاجه واحده هاتغلب علي الموضوع ده بنسبة معينه مش ميه ف الميه
انك انتي تبقي واثقه ف نفسك
صدقيني لو صحيتي من النوم وبصيتي ع نفسك ولاقيتي نفسك واثقه ف شكلك واثقه ف نفسك من جوه ومن برا
هايتغير نمط حياتك ومش هاتحتاجي ادوية
بصي لنفسك انتي محتاجه ايه ؟؟
شعري اظبطه ؟ اطوله ؟ اقصرة ؟
محتاجه لبس بيت جديد ؟لبس دلع وحركات ؟
محتاجه ادلع نفسي علشان اشوف انا نفسي بصورة احلي
هايفضل الراجل يعشق اللي واثقه ف نفسها حتي لو نار الغيرة مموتاها
لأن النق الكتير بيفصل الراجل من بيته
انا مش هاضحك عليكي ربنا مايحط حد ف مواقف دي بس انا عن نفسي ممكن اكون بنصحك وماقدرش اعمل كده لاني من النوع اللي لما بغيير بموووت بجد وبيبان عليا
بس الخطوات اللي فوق ع مدار فترة زمنيه عملت كل حاجه والغيرة هديت جدا معايا
الحمدلله
بقت الغيرة اخف ومش بتخنق
مجرد اسئله ايه الاخبار حصل معاك حوارات فيها بنات ؟
انا اصلا مجنونه بجد بغيير من اي واحده ماشيه تكون ملفته جوزي يبص عليها مع انه بفضل الله بيراعي ربنا ف نظاراته ربنا يصلح حالنا وحال ازواجنا
بس كل ده هدي الحمدلله لما بقيت اشوف اني جميلة
انا الحمدلله جميلة وهو اللي بيتجنن من نظرة الناس عليا لما بكون معاه
بس حسيت اني بضيع من سنين حياتي ف غيرتي عليه واعقد نفسي وانا ف الاصل ممكن ابقي واثقه ف نفسي
اصل اللي مش واثق ف نفسه مش معناها انه وحش بلعكس انا الحمدلله جميلة بس مش واثقه ف نفسي بس اتحسنت كتير
حاولي يا قلبي انك تتقبلي الوضع لانك مش هاتخلصي
مدام هو زوج محترم ربنا يصلح احوالكم
 

يمكنك أيضا مشاهدة