اصالح حماتي وخطيبي ازاي

[المحتارة]

انا مكتوب كتابي وهتجوز بعد شهر المهم المهم انا بعمل عفشي عموله وشقتي ماشاء الله كبيره المهم خطيبي بعتلي الكتالوج عشان اختار العفش وحماتي قالتلي شوفي انتي عايزه ايه وقوليلي وهيعملهولك علي طول اختارت صالون وركنه ونوم وأطفال وسفره فقط الحاجه اتعملت المهم طلعت عشان اشوف حاجتي لقيت السفره متغيره كل حاجه زي ماقولت ماعدا السفره لقيتها سفره بدل اللي اختارتها كنت مختاره ست كراسي لقيتهم تمانيه ومعاهم كلوسو وبوفيه ونيش قطعتين قولتلو انامخترتش ده انتو بتعملو علي مزاجكم قالي امي عجبها ديه أكبر احلي وقالت تعملهالك مفاجاه وتفرحك قولتلو ومين قالك اني فرحت انامش عايزه ديه انااللي هقعد في حاجتي مش مامتك ومشيت وسبته المهم لما روحت مامته اتصلت بيه وقالتلي يابنتي مكنش قصدي اناقولت هتفرحي اناعملتهالكو هديه علي حسابي قولتلها وانتي لازما عشان تجبيلي هديه تبقي علي زوقك المهم قفلت معايا وزعلت وخطيبي برضه زعل ومبيكلمونيش واهلي كلهم مغلطيني جدا واناندمت وعايزه اصلحهم بس مش عارفه اعمل ايه قولولي وشكرا

 

[دانيا]

بصراحة اسلوبك وقح جدا. الست قالت العفش هدية. مفروض تمشيها و تشكريها. قلة ادب

 

[bfifa]

يالهوى انتى بجد قليلة الذوق جدا وجرحتى واحرجتى الست اللى كانت عايزة تفرحك وعاملالك بدل ال ٦ تمانية .. حتى لو ماكانتش على ذوقك معاكى ممكن حاجة تضايق بس رد فعلك وحش اوى .. ممكن كنتى تراضيها ساعتها وتشكريها وبعدين تتكلمى مع خطيبك لوحدكم .. وبتسألى اعمل ايه اجرى على تليفونك عيدى عليها وقوليلها جايالك بكرة.. وماتزعليش منها وتقفشى لو لقيتيها مضايقة ليها حق بوسى على راسها وقوليلها ماكانش قصدى اجرحك ولا اضايقك انا فعلا كنت قليلة الذوق والله هتشيلهالك جميلة وتعرف ان انتى بنت اصل.. عمر ماالاعتذار بيقلل من حاجة دة بيرفعك لفوق

 

[Mariam MOo]

اتصلى اعتذرى لحماتك وخطيبك ....وعلى فكرة انتى فعلا غلطانه ...الست كانت نيتها صافيه من ناحيتك...ومكنش قصدها وعملاها على حسابها....المهم تتصلى تعتذرى لخطيبك وحماتك ....والمره الى جايه تحاولى انك توصلى المعلومة بتاعتك بطريقة اهدى شويه ....وتلاحظى فرق الست دى حماتك يعنى من مقام مامتك