نفسي اتعامل مع حماتي

م

ميمي جمال

غير مسجلة
السلام عليكم / انا هدخل ف مووضوع علي طول انا مجوزه من سنه وحامل دلوقتي الحمد لله بس فكره اني حاسه اني لسه عروسه جديده ومن حقي ادلع والبس وخصوصا اني متربيه ف بيت معايا ولدين اخواتي وبابا شديد كان بيرفض البس بيجامه ضيقه ولا قصيره وكاني قاعده وناس غرب هيزرونا وجبت لبس كتيررر وقت جوازي عشان اعوض كل دا ولكن حماتي جوزها متوفي وكان عايش معاها زوجي ولما اجوزنا قعدت كام شهر ف بيتها واخوات جوزي وجوزي كمان رفضوا تكون لوحدها وبقيت تقضي فترا عند كل واحد وساعات نروح بيتها نقعد معاها وبتقعد ب الشهر عندي ويشهد ربي اني مش مضايقه هي زي امي واحتراما لزوجي بشيلها فوق راسي الشهر دا او اكتر كمان وهي متعوده تصحي بدري بصحي قبلها وبحضرلها فطاار وبكون طول ما هي صاحيه انا كمان صاحيه اخد بحسها ونكلم ولكن هي تعددديل عليا ف كل حاجه لو عملت اكل معين انتي مزودة كدا لي لا لازم تمسكي شويا لا انتي المفروض تكوي كل هدوم جوزك اول ب اول لا تروحي سوق كل يوم خضار يكون صابح انا ف اخر حملي وكل شويا شاي قهوه اكل فاكهه انا مش زعلانه ولكن حركتي بطيئه وانا ضعيفه وكنت باخد حقن مثبتات حمل كمان ومبرفضش طلب ع طول حاضر ونعم وبتنتقضني كتير وتفضل تقولي اسكتي وبعمل نفسي بضحك والقيها تشتكي ل جوزي مراتك فين وفين ع ما حاجه اللي طلبتها تخلص دا غير ان اكتر حاجه نقطاني اني كل ترنجاتي كنت جيباها ع مقاسي لما حملت اضيقت بقيت لا متقعديش كدا عيب اتعلمي الادب الهدوم توسع بقيت كل يوم ف عز الحر بجلبيه بيت لما تعبت اوي ولما باجي اكلم جوزي يقولي مهما تعمل عدي وسكتي دي امي وهي ترنجات عادي صحابي كانوا بيلبسوها ف بيتهم قبل جواز وبحسها بتعما كدا لاني انا الوحيده مبكلمش سلفتي الاكبر مني عند امها ع طول والمتوسطه تنكه بغبااااااء ومبتصحاش قبل العصر فهي ع طول عندي ولو وقفت ف بلكونه وانا نشره غسيل تقولي ازاي ابقي موجوده وتلبسي قمصان نوم دي مع اني بلبسها بليل بكون انا وجوزي لوحدنا وقفلين باب قلتلي طول مانا موجوده ملمحش يتلبس قميص تاني كدا دا كدا عدم احترام لوجودي وزعيق بس وانا مش ضدد خالص انها تكون عندي ولكن انا فين حقي فكرت اروح عند امي واغضب بس امي قلتلي لا غلط وهتطلعي نفسك غلطانه اللي مش قادره تتحمل حماتها وهتعملي مصيبه مع جوزك وخبت ع بابا وقلتلي متخربيش بيتك اعملل اييييه
 

bfifa

فتوكة ونص
ماتقعديش كدة اتعلمى الأدب!
وازاى تلبسى قمصان نوم وانا موجودة
يالهوى ..
البسى واتدلعى براحتك فى بيتك
 
اوعى تغضبى تروحى بيت امك عشان سبب تافه ذى ده الحل خديها على قد عقلها تحولى تمتصى غضبها وتقولى لها ماما حبيتى لو ماكنتش البس الحاجات فى بيتى البسها فين احنا ستات ذى بعض لكن اوعى تكونى بتلبسى ضيق وكده لما الباب يخبط اما بالننسبة للخضار والكلام ده اقنعها مفيش حاجة اسمها خضار صابح ان الخضار بتحفظ فى التلاجات عند الخضورية وهاتى لها تورمس جاهز المية السخنة اما بنسبة للاكل قولى لها بتحبى تعملى كل حاجة نفسك فيها اوفر ما نشتريها بتكون غالية وكمان اكل الشارع مش نضيف احسن حاجة شوفى الاكل اللى هى بتحبه وتطبخيه لها مع اكلك انت وزوجك اهم حاجة شغلى قران فى البيت واظبى على صلاتك وقت سماع الاذن خليها تصلى معاكى بطريق غير مباشر تعريفها انها امك التانية نفسك تعملى كل حاجة برضاها يجوز تتعدل معاكى
 

لمار

فتوكة
انا هقول رأى المتواضع بعد 12 سنه جواز بصى ياستى اول لو كنتى ملاك نازل من السما عمر حماتك ماهتحبك ابدا دايما بيبقى فى حته الغيره فالحل ايه بقى
1.اتعامل براحتك فى بيتك ع الآخر. 2.وحسسيها انها ضيفه ومتجيش على نفسك علشانها لانك مهما عملتى مش هتتشكرى معاها ابدان وده عن تجربه ولما جوزك يطلبك قوليلو مش هينفع أصل ماما قالتلى أنه ماينفعش يحصل كده او أنى البس قمص طول ماهى هنا خليكى ذكيه اكنك بتكلميه عادى مش بتشتكى يعنى صدقينى كل ماتحاولى ترضيها هتيجى عليكى اتعاملى معاها عادى متيدهاش اكبر من حجمها عشان متخربيش حياتك خلى لكل واحد حدود معاكى وخصوصا سلايفك وحماتك ولما تعملى كده هترتاحى






 
ش

شمس و قمر

غير مسجلة
طفشيها
حاولى تجيبى فران و صراصير لعبة بشكل الطبيعيين بالظبط
حتلاقيهم عند محلات ساحر الاطفال
و حطى فار جرذ كبير على السرير ال بتنام عليه
و صوتى اول ما تشوفيه و اجرى و اخرجى بره الاوضة
قولى لها انا حطيت سم فران فى الشقة كلها من يومين لان جارتى خوفتنى من انهم منتشرين
بس ما كنتش مصدقاها
قولى لها جارتى قالت لى حتى لما بقفل البلكونات ففيه فران بتدخل بين الشيش و الازاز لان ما عندهمش عظم بجسمهم
جسمهم لحم و غضروف فبيمطوا نفسهم و يدخلوا من خرام الشيش
يعنى غير منتهيين
و برقى و انتى بتكلميها و قولى لها مش عارفة اعمل ايه
لحد ما تغور
و افضلى كل ما تحسى انها حتيجى اكدبى و قولى يوميا بشيل فران جرذان من البيت و يوميا بحط سم فران
 

Amals

فتوكة
عيشى براحتك فى بيتك بلا قرف .. هى لو عندها دم اصلا تقعد فى بيتها . انتى فى سجن و لا ايه ؟؟
:mad::mad::mad:
 
بصي انا بحب بصراحةة اسمع من الطرفين لأن كل اللي بيتكتب بيكون من وجهة نظر طرف واحد
احترمت فيكي حبك لزوجك واحترامك وتقديرك لأمه
بلنسبه لموضوع اللبس اسفه بس ممكن يكون عندها حق ف نقطة اللبس حتي لو في بيتك
ازاي تلبسي قميص نوم قدام حماتك دي حاجه خادشه للحياء
مش من اخلاق البنت المحترمه اللي عندها حياء
مش هاقولك صح انها قالتلك اكييييد انا ضد انها تقولك كده وان دي حاجه ماتخصهاش
وتحمد ربنا ان ليها مرات ابن بتراعيها ومستقبلاها ف بيتها
بس احنا كا بنات متجوزين اكيد من الحياء هانتكسف نلبس الضيق والمحزق
وضعك مختلف عن اي واحده لان حماتك بتيجي شويه تقعد عندك
وصدقيني اللي يقولك اللبسي او بلمعني الصحيح اقلعي ف بيتك براحتك
في نقص ف التربيه للأسف
للأسف ماينفعش انصحك بحاجه زي كده لأن الحاجات دي بتبقي من جوه الواحده
ربنا يهدينا ويهدي الجميع
نصيحه ماتكرهيش حماتك لأنك تلقاااائي لو كرهتيها هاتبقي مش طايقه جوزك
حاولي تراعي سنها وان في ناس كبيرة كده بتفضل ترمي كلام وتقول وتعيد كبري دماغك يابنتي اتعاملي لوجه الله انتي مش داخله حرب مع حماتك
علشان حالك انتي يكون افضل حاولي تتعاملي مع الوضع اصل مدام انتي مش متفقه معاه من قبل الزواج ان ممنوع مثلا تقولي ماما هاتقعد عندي وكده وانتي رضيتي بكده وحاسه انك بتعملي خير اعمليه وكمليه علشان تاخدي جزائه كامل طلعيه من جواكي وابدأي كبري من التفاصيل
اللبسي براحتك بس ابعدي عن المحزق والمكشوف علشانك انتي مش علشان حد
 

حسناء محمد

فتوكة جديدة
بصي يا حبيبتي حلك هو كبري دماغك خاالص تقول وتعيد وقولي ماشي انا كل دا اتعمل معايا واكتر انا عيشة مع حماتي بس مع الوقت عرفت اني الناس الكبار كدة اقل كلمة بترضيهم حاضر يا ماما وماشي والبسي ترنجات برحتك قللها انك زي امي والقمصان في اوضك بس ومهم تعملي تحولي تعمل هتبقي منتقداكي فاشتري دماغك بحاضر تمام
 

يمكنك أيضا مشاهدة