اخويا خطب من شهر

[المحتارة]

اخويا خطب من شهر عروسته حلوة وكل حاجة بس بتتكلم كتير وبنحسها مش بتتكسف وواخده علي الكل رغم انها جوازو صالونات امي علقت وانا كمان ودلوقتي اخويا برضوا استغرب احنا دلوقتي ازاي نعرف البنت خام ولا فاهمة يعني اي جواز وكده يعني احنا كنا عايزين لاخويا بت بتتكسف مش بتضحك معانا ومع ابويا وامي وبتكلم امي كل يوم الصبح تصبح عليها بسرعه جدا واخدت علينا

 

[bfifa]

لا حول ولا قوة الا بالله
فين السؤال
كل دة علشان البنت حبوبة وعشرية وبتراعى امك كل يوم وتتصل تسأل عليها ؟!
اللى اعرفه تسألى ان البنت مابتعملش كدة
وبعدين ايه كنا عايزين لاخونا بنت بتتكسف؟
هو انتوا تعوزوا ولا متعوزوش ليه؟
مش فى راجل هو اللى هيتجوز
اتقوا الله ومادخلوش فى دماغ اخوكى حاجات وحشة عن البنت

 

[remoo]

ههههههههههه هو حد يلاقي واحده فرفوشه ...ده انتوا ناس كئيبه
في ناس طبيعتها كده ياحبيبتي بتكلم كتير
ايه خام وايه الكلام الي انتوا بتقولوه ده
انتوا محتاجين واحده متعبركمش غير في الاعياد

 

[Mariam MOo]

انا طبعا يوافق الرأين الى فوقى
مش ضرورى عشان هى اخدت عليكوا بسرعة يبقى هى مش كويسة .....ومش لازم تكون واحدة خام والكلام الى حضرتك بتقوليه المهم تشوفوا تدينها هل بتصلى ومنتظمة فى الصلاة .....هل لبسها محترم ومحتشم.....هل عارفة ربنا وهتتقى ربنا فى اخوكى وفيكم .....هى دى الاسئله الى الواحد الى المفروض يسألها مش خام والكلام دا.......وبعدين اخوكى هو الى يقرر عايز واحدة خجولة ولا واحدة عجوزة هو الى يقرر مش انتو عشان هو الى هيتجوزها مش انتو .....وانا مش فاهمة اى الى يزعلكوا انعا بتتصل كل يوم تصبح عليكوا يعنى ....اى فيها لما تاخد عليكوا بسرعة .....انا الى عايزة اقولهولك ان متحكميش عليها بحاجه وحشة وانتى متعرفيش عنها حاجه (إن بعد الظن إثم) ....انا اغلبية صحابى كدا على فكرة ....واحدة فيهم كانت بتاخد على اى حد بسرعة جدااا ....... ودلوقتى متجوزة ومعاها بنت ربنا يحفظهالها ويجعلها ذرية صالحة ليها يارب .....وجوزها دا ....اخدت عليه بسرعة فوق ما تتخيلى .....وعلى فكرة هى سازجه جدا والى فى قلبها على لسانها وعلى نيتها على الاخر و واضح كدا ان خطيبة اخوكى زيها .....متظلموهاش .....وسيبوهم هما يتعرفوا على بعض ....ولو مامتك متضايقة من انها بتكلمها كل يوم الصبح.....يبقى تقولى لاخوكى يخلى خطيبتو متكلمش امك .....وسيبوهم هما يتعرفوا على بعض

 

[سوسو لولو]

للأسف يا قلبي اغلب البنات بلا حياء الا من رحم ربي
وللأسف الشديد الراجل بيدور ع الحياء الخجوله اللي بتتكسف بيتصدم ف العروسه بيلاقيها واخده راحتها بزياده جدا
للأسف اعرف اتنين حصل معاهم كده
والأتنين بيتكلمو ويهزرو
وشويه شويه الموضوع بيتطور خلي بالك بتبقي هي اللي بتدخل وبتسأل وبتبقي عايزة تعرف كل حاجه
وللأسف هي اللي بتكون ليها سلطه ع الراجل وياويله لو ماسمعش كلامها
الحياء ده عملة نادرة والبنات دلوقتي الا قليل بقو مايفهموش يعني ايه حياء وبيقولو علي اللي بتاخد راحتها ف الكلام فرفوشه
فين زمان العروسه تبقي خجوله وبتحترم اهل الزوج
حصل مع حد اعرفه كان عايز واحده عندها حياء اتفجأ انها واخده راحتها ف الكلام والاسلوب وفعلا بتاخد ع الواحد بسرعه وعلي فكرة منتقبه علشان ماتحسبيش حاجه تانيه
وقال مش مهم مدام هاتعينه علي الدين وكده
اتصدم بعد الزواج
شخصيتها هي هي ماتغيىتش بتتكلم وتاخد وتدي
بس بقت بتدخلات
وبقت عايزة تركب هي
وتمشي كلامها عليه وعلي اهله
طبعا هو ماتحملش كده لانه راجل وماينفعش.بيت يبقي فيه راجلين
الحياء ده لو مش موجود ف العروسه نصيحه لوجه الله
خدو ديلكم ف اسنانكم بسرعه
انا ماشفتش موقف او اتنين انا اتصدمت ف ناس كتير اوي
لو اخوكي مابيحبش النوع ده هاتقرفه ف عشته
لو اخوكي من نوع الرجاله اللي بيحبو البنت تكون عندها حياء مايخدش غير اهم حاجه تبقي عندها حياء غير كده مانصحكيش
لكن في رجاله عادي بترضي بلبنات اللي كده
ربنا ييسرلكم الخير

 

[Amals]

و لو كانت العكس برضه كنتوا اشتكيتوا ... مش فاهمة الناس عايزة ايه ؟

 

[أم العيال]

خلاص اخوكي لو مش عاجباه يسيبها .....ولو ان كل اللي بتقوليه مميزات مش عيوب بس انتو مش عاوزين واحدة بتنكسف انتو عاوزين واحدة تخاف منكو ودي شكلها مش كدة....