Ghadoda ♥
فتوكة جديدة
متقدملي عريس مطلق عنده ابن، اما عندي 23 سنة وهو 31 ، هو دكتور وعايش في المانيا ومش هيعرف ينزل حتى للفرح لظروف فعلا غصب عنه، وهو شخص كويس من طريقة كلامه، والناس كلها شاهداله بالادب والاحترام، بس فيه مشكلة ،مشكلتي خالص مش عن كونه مطلق ولا عنده ابن، بالعكس هو عادي خالص خصوصا انه مش محسسني ابدا ان الموضوع مأثر عليه وبالتالي مش هيأثر عليا، فيه حاجة بس واحدة، هو وضح ان احد اسباب خلافه بين وبين مراته مش كل الاسباب لكن ممكن نقول اهمها، انها مكانتش مهتمة بيه اطلاقا ولا بنفسها ومكانتش بتلبس الحاجات اللي البنات بيلبسوها وهكذا، بس هو واضح ان الحته دي هي اللي مأثره عليه شوية، لانه دايما بيقعد يأكد اني احب مراتي تكون مهتمة بنفسها وبيا وتلبس وتتدلع وهكذا، تمام بردو حقه ينوه عن النقطة دي، بس هو بيتكلم فيها زيادة شوية، يعني انا اكيد هعمل كل ده لوحدي والحمدلله انا بلبس من وانا في بيت اهلي ولبسي شيك ، وكنت بقلب في الفيس بتاعه فصصته بصراحه لحد ماعرفت اجيب اكونت طليقته من اللايكات القديمة، وهي بصراحة من الصور فعلا لبسها مش احسن حاجة كلبس خروج ومش لايق ع بعضه خالص بس هي شكلا مش وحشة، ما علينا بردو من ده، انا بس مش حابه الموضوع يكون حاجة ملحة اوي لدرجة اني لو لبست بجامة عادية مرة اتطلق ، هي دي الحته اللي قالقاني، وكمان حته اني مش هعرف اشوفه في فترة الخطوبة غير ممكن مرة او مرتين بسبب انه مش هينزل مصر، وطبعا دول مش كافيين، وهو شخص كويس جدا بس كمان ممكن علشان فرق السن شوية هو في الشات كلامه مقتضب شوية، في التليفون احسن كتير، وهو اوقات كتير بيكون مشغول مش بنعرف نتكلم كتير وخايفه ده يسبب مشاكل قدام، وبقول لنفسي بردو المشكلة دي هتتحل لما نكون سوا ،بس بردو محتارة شوية محتاجة رأيكم واسفه ع الاطالة.
