طريقة عمل المكرونة المبكبكة الليبية بالصور

fatakat

مديرة الموقع
طاقم الإدارة
ازيكم يا فتوكاتى عامليين ايه

انهارده هنعمل مكرونه مبكبكه هى اسمها كده اكله ليبييه حلوة اووى وسهله كتير وكمان مغذيه ومفيده لانها فيها كل العناصر الغذائيه تقريبا
كمان كلها فى حله واحده يعنى مش هتتعبى فى 100 حله وطبق

كمان الى عندها اطفال ومش بياكلوا الخضر هياكلوه انا متاكده بالطريقه ده انا عرفت الاكله ده من اخو جوزى هو كان عايش فى ليبيا واما اتجوزت لقيتهم بيعملوها فجربتها وعجبتنى اووى

المقادير

لحمه مقطعه قطع صغيره او بالعظم او فراخ مقطعه قطع او بالعظم او ممكن كمان لحمه مفرومه

خضار مشكل ( جزر بصل بطاطس بسله فاصوليا فلفل رومى وحامى ) اى خضار عندك ممكن تستعملييه

بقول مشكله ( حمص شام مسلوق عدس بجبه ) واى بقوليات حابهاه ممكن تضيفيها

مكرونه خواتم

3 ملاعق كبار صلصه انا بحبها بالصلصه علشان اللون لكن ممكن طبعا عصير طماطم

2 مكعب ماجى اختيارى

توابل ملح وفلفل وكمون وشطه وبهارات توم بودره بصل بودره حبهان وورق لورا

الطريقه


هنحط الزيت فى الحله على النار ونضيف البصل المقطع رفيع اووى ونحمره لغايه ما يبقى دهبى


اول ما يتحمر ننزل بالتوابل ونحمصها كويس مع البصل والخطوه ده مهمه التحميص بيبرز نكها كل التوابل مع بعض وبعد كده نضيف اللحمه ونقلب شويه

بعدين نضيف الصلصه او الطماطم ونغطى اللحمه بالمايه ونسيبها اما تغلى


لما تغلى نضيف الخضار بالتدريج يعنى الحمص والبسله والجزر والعدس فى الاول لانهم بياخدوا سوا

وبعدين نضيف الفاصوليا والفلفل

بعدين نضيف البطاطس اخر حاجه

واخر حاجه المكرونه

طبعا من غير ما تتسلق متستغربوش هى كده هتستوى فى الصلصه
لغايه الخطوه ده ممكن تحضريها وتسبيها قبل الاكل بعشر دقائق تضيفى المكرونه لانها لازم تتاكل ساخنه علطول لانها لو قعدت النشا الى فى المكرونه بيخليها تجمد فى بعضها


طبعا اللحمه او الفراخ يبقوا معاها بس هنا زى ما قلتلكم انا قدمتهم جنبها لكن الصح يتقدموا فى وسطها زى الكبسه كده

وهى بتبقى فيها صوص يعنى مش شاربه كل صوصها لو لقيتى الصوص قل زودى شويه مايه علشان تبقى فيها صوص

ويا رب تعجبكم وتجربوها

ومتنسوش التقييم يا بنات والردود ودعوه حلوة كده منكم

سلام
 

يمكنك أيضا مشاهدة