انا وجوزى اغراب فى بيت واحد

[المحتارة]

مش عارفة ابدا الموضوع ازاى انا متجوزة بقالى 12 سنة انا بشتغل ودخلى كويس جوزى قبل الجواز كان معايا انسان تانى خالص رومانسية وحنان وخروجات جامدة عليا وانا بطبعى مليش طلبات كان حىيص شوية بس قلت يمكن عشان نتجوز بسرعة بس فى الفترة قبل الجواز اتغير فجاة بقيت بحس انه مش طايقنى بس قلت يمكن من ضغوط توضيب الشقة والعفش وبعد الجواز يتصلح بس اتفاجئت بعد الجواز بانسان تانى خالص مهما البس واتدلع كانه مش شايفنى كنت اقضى ساعات اتزوق وييجى من بره يبصلى من فوق لتحت وميتكلمش يقضى الواجب اللى عليه وخلاص كان بيروح بيتهم وساعات ينام هناك بس بالنهار وياكل ويتفرج على التليفزيون ومعاه مفتاح الشقة عادى كانه لسة عايش هناك وانا مليش وجود مفيش بينا كلام ولا سلام ولما اقعد اتكلم ميردش عليا يبص للتليفزيون ولا كانى موجودة افضل اخترع فى حكايات لحد مزهق ولما حملت اول حمل لقيته مرة واحدة انفصل عنى فى اوضة تانية كلمته كتير مفيش فايدة ودخلت ماما الله يرحمها وبابا فى الموضوع اتحجج انى حامل وبيخاف يخبط فيا وانى طول الليل مش بنام وبقلقه فاقتنعوا بس انا لا
المهم كنت اروح اتلزق وانام جنبه يتسحب من جنبى ويقوم ينام بره ولو صحيت قلتله رايح فين يزعقلى نامى باة حسيت باهانة وبقيت انام فى اوضتى وقولت يمكن لما اولد يتغير بس مفيش فايدة فضل زى ماهو انا فى اوضة وهو فى اوضة غير كده عنده برود فى كل حاجة الاكل عنده ملى بطن عملت اكل كويس زى وحش متفرقش لبست كويس او مبهدلة متفرقش قعدت معاه او اتشغلت عنه متفرقش اابيت بالنسباله لوكانده ييجى ياكل وينام وبس ده غير انه انسان مادى عايز ياخد وبس كان يقولى مش معاه فلوس وهو بيحوش من ورايا واكتشفت ده بالصدفة لما لقيت دفتر التوفير بتاعه فى العربية وواجهته قالى كله ليكى ولولادنا كل حاجة جدت علينا من يوم متجوزنا ياما انا اللى جايباها ياما دافعة نصها طلبات البيت بيجيبها الضرورى اوى اى حاجة زيادة انا اللى اتحملها وساعات كان يقولى معييش فلوس اديله كنت بجيبله كل حاجة هدوم وبرفانات وشرابات ومهتمة بيه رغم اهماله ليا وبشهادة كل اللى يعرفوه انه نضف بعد متجوزنى كان بيرمينى بالساعات ويخرج يروح لمامته وصحابه مفيش الخروجات اللى قبل الجواز اهله مش بيجولنا ولا بيودونا رغم انى حاولت كتير اتقربلهم بس ماندمجتش معاهم مش بيكرهونى بس مفيش ود ولا حتى بيزعلو لو غبت عنهم كلمته بهدوء وبعصبية بالتفاهم وبالخناق ولا كانى بتكلم برود فظيع كل حياتنا مقضيينها خصام ولا بيهمه حتى لو قعدنا بالشهر والشهرين وفى مرة قعدنا سبع شهور خصام
فى مرة قررت انى اطلق كانت امى مريضة اوى عندها فيروس سى سافرت القاهرة تتعالج بس كانت حالتها اتاخرت انا قررت لما ترجع انى اطلق لانى معتش طايقاه بس ربنا اراد مترجعش وماتت هناك وجت اندفنت هنا انا وقتها كنت منهارة اوى واول مرة احس انى صعبانة عليه وبدات اقرب منه واحاول احسن علاقتى بيه واحاول اتغاضى عن عيوبه وفعلا كانت فترة كويسة بس مااستمرتش بسبب حاجتين اولا انى حملت وماما كانت مكملتش شهرين وابنى لسة سبع شهور فى الاول كان متقبل الموضوع خصوصا انه غصب عنى حملت على الوسيلة بس مجرد قال لمامته اتغير 180 درجة اكتشفت انه بيتاثر بكلامها جدا مع انه قبل الجواز مكنش مفهمنى كده غير كده كنت فى الفترة دى اكتشفت انه بيكلم واحدة بدات اتابعه من غير مايعرف وجبت عنوانها وسالت عليها وعرفت انها ارملة وعايشة مع ابنها لوحدهم ولاحظت معاه مفتاح غريب اساله يقولى بتاع واحد صاحبى خبيت سلسلة المفاتيح وهو نزل وانا روحت عنوان الست واخدت المفتاح وعلى فكرة كان مفتاح كمبيوتر وحطيته فى الباب وفوجئت بيه بيدخل الباب خرجته من سكات ونزلت فى الشارع وانا ماشية تايهة وبكلم نفسى وبرضو سكت عشان اشوف الموضوع هيوصل لفين بس مقدرتش وواجهته قعد يقول مبررات متدخلش على عيل صغير بس عملت نفسى مصدقة وتابعته برضو فترة بس لقيته فعلا انتهى بس اللى مانتهاش الغربة اللى بينا مرت السنين شفت الويل بعد موت ماما وطفلين ورا بعض وشغلى ومحدش بيقولى انتى فين ولا حتى هو بس شهادة حق حماتى شالت ولادى وهما صغيرين كانت بتاخدهم عشان شغلى وهو اللى كان بيوديهم ويجيبهم وانا فى الفترة دى كنت شايلالها الجميل ومهما عملت كنت بستحمل لدرجة كان ممكن تشتمنى فى وشى واضحك واقولها ملبش بركة الا انتى وعملت معاها اللى مفيش مراة ابن تعمله وهى نفسها كانت بتقول بس كل ده اتغير بسببه برضو
ماكنش بيحبنى اروح ولا اندمج معاهم لدرجة كنت اروح فجاة وهو يبقى هناك بشوفنى يقولى ايه اللى جابك واسكت واستحمل مش بيعرفنى اى حاجة عنهم ولا عنه بالنسبالى هو كانه شخص غريب معرفش عنه اى حاجة معرفش اهله ولا اعمامه وهو مش بيندمج مع اخواتى ولا بابا حاولت استفزه بكل الطرق اللى ممكن تخلى اى راجل يولع مفيش بخرج واروح واجى ولا يقولى رايحة فين ولا جاية منين هو من الاول ادانى كارت بلانش اعمل اللى عايزاه فى الاول كنت اقول ثقة بس مش للدرجة دى ده برود مهما غبت عنه ولا الهوا ممكن اخد ولادى و اخرج واعند واقعد برة لوقت متاخر ولا يرفع السماعة يسال انتو فين مع انه معاه عربية وانا دافعة اكتر من نصها واكتشفت بس بعد وقت متاخر انه اتجوزنى مجرد صفقة لانى دخلى كوبس وحدوتة الحب فى الخطوبة كانت تمثيلية بارعة عمرى محسيت بالحب ده بعد الجواز كل مدى مبحس الفجوة بينا بتزيد ومهما حاولت اسدها يزودها كل مااحاول اقرب منه يترجم ده على انى عايزة ** وبس ويلا تقضية واجب حتى العلاقة بمنتهى اابرود من غير ولا كلمة حتى كلمة بحبك كنت بشحتها منه وميرضاش يقولها تخيلو كل ده وراضية وساكتة عشان ولادى ميتبهدلوش بس حاسة اجمل سنين عمرى بتضيع ووصل الحال اننا فعلا بقينا اغراب هوبييجى يدخل اوضته يطلب الاكل يدخله لوحده ويقفل الباب عليه ياكل ويقعد شوية وينزل ييجى اخر الليل يدخل اوضته يقفل عليه ويتفرج على التليفزيون وينام معاملته مع الولاد جافة لدرجة بقو بكرهو وجوده فى البيت وانا اقعد اقولهم بابا عيب منقولش كده العلاقة بينا بقت كل شهرين تلاتة مرة ****بس للاسف انى كنت بحبه بجنون رغم ده كله وبدعى ربنا يحببه فيا واعيط واطلب من ربنا لحد ماتعبت من معاملته واهماله ودعيت مرة ان ربنا يشيل الحب ده من قلبى وللاسف ده اللى حصل اتغيرت مبقتش بحبه وبقيت كمان بدعى عليه مع ان عمر قلبى ماطاوعنى قبل كده بس اهماله وقسوته هى السبب وفوق ده كله اكتشفت انه بيحب اختى الاصغر منى حاولت اقنع نفسى كتير انه بيتهيالى بس كل تصرفاته بتقول كده ورغم انها اتجوزت وخلفت بس برضو تصرفاته فاضحاه كرهته بشكل فظيع بس غصب عنى مستحملة عشان ولادى اللى انا اصلا شايلة كل مصاريفهم ولبسهم وكسوتهم حتى الدكاترة انا اللى اودى واجيب العلاج حتى مصروف المدرسة انا اللى بديه بنخرج لوحدنا وكل حياتنا لوحدنا وهو مالوش وجود فى حياتنا ولو خرج معانا بديله فلوس الخروجة ياما يخرجنا خروجة زبالة ولو اصريت على مكان كويس هيبقى نكد على الولاد اللى هو عارف انهم ايدى اللى بتوجعنى عمره ماساب فلوس فى البيت لاى ظرف عمره ما ادانى فلوس وقالى اشترى بيها حاجة طلبات البيت الضرورية وبس وعايش لنفسه بيشترى هدوم لنفسه وواخد باله من نفسه ومقضى حياته بين صحابه ومامته وانا وولادى ملناش مكان فى حياته ساعات بخاف على نفسى من الفتنة بس بلجا لربنا عشان يحمينى انا طولت عليكو اوى عارفة ان حكايتى ملهاش حل بس انا بفضفض معاكو ادعولى ربنا يصبرنى ويعوضنى فى اولادى وهو منه لله

 

[Asmaa Hamza]

طالما انتي بتعملي كل حاجه لولادك وهو مالوش دور اتطلقي يا حبيبتي