انا واقفه للعرض.. اتفرجي يا هانم اتفرج يا استاذ

[المحتارة]

ايوه فعلا انا كده حسبي الله ونعم الوكيل في كل اللي جرحني

انا خريجة صيدله وبشتغل في صيدليه وهيا دي المشكله
انا بعاني يا جماعه والله

مشكلة حياتي العرسان واهاليهم واللي بيعملوه فيا
مره اروح الصيدليه الاقي واحده مستياني بقالها ساعه
ناس قالولها عليا وجت تتفرج وقعدت تسالني علي معلومات عني
وطبعا اللي في الصيدليه عارفين انها ام عريس
ومشيت علي اساس انها هتيجي البيت خلاص
بس اللي حصل انها خرجت ولم تعد
الظاهر ان ابنها جه يتفرج وانا معجبتهوش انا قعدت اسبوع متنكده
لانهم في الصيدليه كل شويه يسالوني هيا اتصلت ولا لا وطبعا عرفوا اني اترفضت

واحده تانيه ادخل برده الاقيها واقفه مستنياني واتكلمت معايا شويه
ونفس اللي قبلها خرجت ولم تعد بعد ما فضحتني في الصيدليه

وواحده كمان تدخل تشتري دوا هيا وابنها وتفضل تسال علي اي حاجه
علشان تدي ابنها فرصه يعاين البضاعه وبعدين وانا بجيب الدوا الاقيها بتغمزله في دراعه وبتقله ايه رايك
عادي كده قدامي
ونفس البني ادمه جت بعدها بس مش هيا وابنها هيا ييجي وخمسه كمان اكنهم بيشتروا دوا
وواقفين يتفرجوا ووالله عماله تسالهم برده علي رايهم كده قدامي


وواحده تدخل عايزاني في كلمه الاقيها بتقولي علي ابنها وتقوم مطلعه صورته من الشنطه علشان اشوفها
قدام اللي في الصيدليه وقدام الدكتور

واللي الاقيه يوريني صورة اخوه علي الموبايل علشان اخوه مسافر
واما اخوه رجع شافني واترفضت عادي جدا

واللي يسال الدكتور عليا وميجيش تاني والدكتور يسالني مجاش ليكوا ليه اقوله معرفش
طبعا يعني اصلي معجبتوش

الاكتر كمان الاقي واحد بيجيلنا الصيدليه علي طول قال للدكتور انه عايز يتقدملي
تخيلوا انه عنده 40 سنه وشغال مدرس ومن بلد ارياف ولسه بيبني شقته
ليييييييه كده بس انا قليله اوي كده علشان الراجل اللي قد ابويا ده يفكر يتقدملي

وكمان الاقي واحده بتكلم بتسال خالتي علي عروسه لابنها
وبتقلها انا شفت بنات كتير ومعجبتهومش وقالتها عليا (متعرفش ان دي خالتي )
بتقولها شفت دكتوره فلانه في صيدليه فلانه مش حلوه حواجبها تخينه
واما عرفت انها خالتي تقوم تقلها ابقي خلي مامتها تعملها حواجبها

انا مدمررررررررررررررررررررره والله
ايوه انا مبعملش حواجبي وراضيه والحمد لله هيا مالها تقول عليا كده ليه
مش انا حره في نفسي هيا الناس بتعمل كده ليه
هوه انا لازم ارضي الناس ولا ارضي ربنا

انا عمري كلامي مع الناس كان وحش عمري مجرحت حد
انا لو حد زعلان مني بكون مضايقه وافضل اعيط
لو غلطت في حد بتاسفله بحاسب علي كلامي مع الناس
بوزن كل كلمه بقولها بفكر في شعور اي حده قبل ما اتكلم

ليه يتعمل فيا كده

النتيجه من ده كله ان ثقتي في نفسي صفر طبعا
انا بمشي في الشارع بداري من الناس حاسه اني قليله

رغم ان الواقع اني مش كده انا الحمد لله عيلتي كويسه جدا
ومتدينه الحمد لله وبفضل الله اي حد يتكلم معايا بيحبني
وبيتهيالي شكلي مش وحش اوي كده
والله في ناس كتير بيقولولي اني حلوه بيجاملوني ولا ايه

اعمل ايه اقعد من الشغل علشان ارتاح من الناس وقلة ذوقهم

ادعولي يا جماعه

اللهم اجبر كسر قلبي
اللهم اني مغلوب فانتصر

 

[Mariam MOo]

خلى واثقة فى نفسك واحمدى ربنا انو بعد عنك الناس المتنمرة دى .....ومتعمليش حواجبك واصبرى ...ان مع العسر يسرا.....وان الله مع الصابرين......خلى عند ثقة فى ربنا وفى عوضه ومتقبليش غير بشخص مناسب ليكى ومقدر للجوهرة الى فى ايدوا شخص متدين عارف ربنا ....هو بس دا الى هيقدرك......الرسول عليه الصلاة والسلام قال(تنكح المرأة لارع لجمالها وحسبها ومالها ودينها فاظفر بذات الدين)صدق رسول الله صلى الله عليه وسلم....متبطليش من الشغل ومتعمليش حواجبك ....اهتمى بنفسك وحطى ماسكات وشيلى ما بين حواحبك بس ...لكن متقربيش من حواجبك نفسها....،وداكلوا عشان تعززى ثقتك بنفسك بس مش عشان اى حاجه تانى ....خليكى قويه ...واشتنى الشخص الى يقدرك ويحترمك ويعيشك ملكة متوجه......ربنا ينصرك ويقويكى ويقوى ايمانك يا حبيبتى❤