متزوجه وسمعى ضعيف

[هبه الرحمن]

السلام عليكم
انا متزوجه وعندى ضعف سمع شديد بالاذن وبسمع بالسماعه مش اوى لازم لازم اشوف حركه الشفايف يعنى لو واحده منتقبه كلمتنى بكون سمعاها بس مش عارفه بتقول اى مش عارفه اترجم الكلام
حاليا جالى حاله اكتئاب بسبب أن مش عارفه اقعد مع اخوات زوجى وحماتى وقرايبى وكدا ف دايما الكل بيتكلم وانا ساكته بسبب انى مش عارفه اسمعهم غصب عنى ف الاقيهم بيستغلو انى مش سمعاهم يقومو يتوشوشو مع بعض ويضحكو ويتعمدو يدايقونى رغم أننا مفيش بيننا اى خلاف أو مشاكل كويسين الحمدلله بس الحركه دى بتدايق
وكمان احنا ٤ سلايف ٢ ف بيت و٢ ف بيت وتحتهم حماتى وانا ف البيت اللى بعيد عند حماتى وانا ف حالى عشان مش بسمع كويس ومش بروح عند سلفتى اللى معايا فى البيت غير ف المناسبات
وسلايفى اللى ف البيت التانى المفروض انهم جايين زياره ل حد جارنا انا وسلفتى يقومو يروحو ل سلفتى تحت ومايطلعوش عندى والموضوع دا بقاله سنين على كدا كل مره يجو تحت ومايطلعوش عندى
ولو جم عندى ف مناسبه يتكلمو قدام الناس كأنهم ملائكه ويتوشوشو لما نكون لوحدنا عشان يتعمدون يدايقونى بس انا هعمل اى ف ضعف سمع هل انا اللى خلقت نفسى كدا
وكمان اخت جوزى بيتها جمبى والاقى الكل هناك عندها عشان تعبانه بس انا مش عارفه اروح واقعد والكل بيتكلم وانا اسكت واتفرح عليهم بس بحس نفسى عزيزه اووووى ويبقى عاوزا اعيط انى مش بسمع كويس وباخد وادى معاهم ف الكلام واروح للكل والكل بيجيلى معلش طولت عليكم بس بصراحه مخنوقه جدا جدا ومش عارفه اعمل ايه

 

[nagham]

شفاكي الله وعفاكي
اللي انتي فيه مش بايديك
الموضوع ممكن مش زي مانتي فاهمة انتي بس حساسة شوية واي تصرف بتفسري بناء ع انك مش سامعة فاكرة انهن بيضايقوكي ممكن تكون تهيؤات عندك بس وهما مش قصدهم حاجة
مدام بتفهمي حركة الشفايف خاولي
تنميها بالكورسات عشان تبقي سريعة فيها
وتابعي مع دكتور نسبة السمع عشان متضعفش
وبلاش تتحاملي على نفسك ياحبيبتي كلنا فينا عيوب وعندنا مشاكل تأقلمي مع الوضع واتكلمي وصاحبيهم وفضفضي معاهم مدام مفيش مشالكل وقوليلهم اشركوني فحوارتكم

 

[amro10]

ربنا يراضيكى يارب و يكيب خاطرك ويشفيكى متزعليش هما ناس قلة الادب والذوق الافضل ممتعامليش معاهم خليكى ف بيتك وجزوزك و الو ف اصحاب بتحبيهم اقطعى علاقتك بالناس دى وخلى عندك ثقة ف نفسك معلش

 

[أميره محمد]

اعملى قياس سمع جديد وهتبقى زى الفل
انتى احسن منهم انا بنتى من ضعاف السمع
ومتهمليش ف نفسك
وهما ربنا يحاسبهم

 

[نوتيلا $]

وعليكم السلام ورحمه الله وبركاته
انا عارفه ان الموضوع يضايق أنهم مش بيشاركوكى معاهم انتى بقا إلى تتجهليهم لما تتجمعي مع بعض سلمى وشويه وخدى بعضك وامشي مش لازم تقعدة معاهم وقربى من الناس الى فهمينك وفهمين ظروفك وخلى كتاب الله ومجالس العلم هى اصدقاء واوعى تقولى لزوجك كده لان ممكن بعد كده يمسكها عليكى أو بجرحك بكلام بخصوص الموضوع ده لو قلك ليه مش بتقعدى معاهم قوليلوا اى حاجه غير الموضوع ده
وربنا يجبر بخاطرك يارب

 

[لمياااء سوسن]

ان شاء الله تتجاوزي مشكلتك حبيبتي

 

[اشرقت الشمس]

السلام عليكم اختى
اول الف سلامة عليكى وربنا يشفيكى ويجعل كل ماتمرين به فى ميزان حسناتك
ثانيا .. من الممكن تكون وشوشتهم مش عليكى أو مش بياخدوا بالهم وبيتصرفوا عادى مثل اغلب النساء فى التجمعات وبيعلقو على حد أو على شئ حواليهم ربنا يعافيك من الغيبة والنميمة ولو فعلا قصدهم يتجنبوكى أو يضايقوكى فانتى مش محتاجة ناس زى دول ف حياتك ارضى عن ابتلاء ربنا ليكى وربنا يرضى عنك ويغنيكى بيه عنهم
واحتسبى ضعف سمعك عند ربنا قضى الواجبات ناحيتهم من مباركات ومناسبات ويكفيكى لو صديقة واحدة أو أخت تكون بتراعى ظروفك بألف واحدة لا تراعى حقوق الإخوة أو النسب أو الصداقة. والله ما فاتك شئ انشغلى بنفسك وحياتك والناس مهما كان صلتنا بيهم ف اذاهم اكتر من نفعهم

 

[walaa selim]

ربنا يكرمك ويصلح الحال ما تحطيش في بالك وماتركزيش مع حد هما ممكن مش قاصدين يضايقوكي ومش عايزين يتعبوكي اهتمي انت بنفسك وبحياتك وزوجك وعيشي حياتك ربنا مديكي حاجات كتير حلوة استمتعي بيها واحمدي ربنا كلنا عيوب الكمال لله وحده.

 

[ريحانة البسمة]

إذا كنتي مقتدرة ابحثي عن أجهزة علاج السمع وراجعي الطبيب. ربما يكون لمشكلتك حل.