مهم || بداية جديدة

فاطمة || Fatma

فتوكة جديدة
حبيت اشارك تجربتي مع فكرة البداية الجديدة كنت الاول فاكرة
انها فكرة وهمية تبع التنمية البشرية و خلاص مجرد كلام مش هيفيدني بحاجة كمان انا كان عندي مشكلة لما كنت بعمل بحث
عنها الاقي اغلب الكلام عنها كلام عام و عايم اوي لدرجة أنه زود توهاني .. عشان كدا قررت بعد سنوات من المحاولات الخص كل اللي قريته و كل اللي جربته و اسهل علي كل شخص عايز يبدأ بداية جديدة بجد و يقطع الماضي اللي وجعه اسفة علي الإطالة

الخطوات اللي هتنفذيها عشان توصلي لحياة جديدة راضية عنها :

1. التخيل : اقعدي مع نفسك في جو هادي فكري في اللي نفسك فيه ، ايه هو شكل الحياة اللي عايزاها ، عمر ما كان التخيل تضييع وقت بالعكس ده بيهيئك و هيشجعك جدا

2. جوانب حياتك : عايزاكي تقسمي حياتي لـ 7 جوانب عشان تسهل عليكي الموضوع و تحسي انك نميتي جزء كبير من شخصيتك ، الجوانب هي :
1. نفسك : تشوفي الحاجات اللي نفسك تحققيها في نفسك صفات معينة عايزاها تكون موجودة صاحبي نفسك و خليكي سند ليها اديها فرصة لانها و الله تستاهلها الاهم انك ترحمي نفسك من الجلد و تطبطبي عليها متوجعيهاش

2. ديني : تهتمي بالعبادات و الاعمال اللي تقربك من الله و تأكدي انك طول مانت قريبة من ربنا نفسيتك كويسة صدقيني انا جربت و ملقتش الراحة غير و انا قريبة من ربنا احكي اللي مضايقك لربنا صلي و انتي ساجدة فضفضي عيطي طلعي كل اللي جواكي هتفرق معاكي جدا

3. الكارير : ايه الشغل اللي بتحبيه و نفسك تثبتي نفسك فيه ، حاجة نفسك تتعلميها مثلا لغة أو شغل هاندميد

4. اجتماعي : اهلك مهم جدا تحسني علاقتك بيهم تشوفي ايه اللي ممكن يقربكم من بعض اكتر اوصلي لنقطة وصل تتفقو فيها أما معاملتك مع الناس نفسك يكون شكلها ازاي القريب منك و الغريب عشان طبعاً المعاملة هتفرق ، نصيحة فالموضوع ده انك تعملي دايرة لاصحابك اللي يستاهلو بس متضيعيش طاقتك علي الناس انتِ اه هتكوني لطيفة مع الكل و مبتسمة ليهم لكن حددي دايرتك و الاهم ثم الاهم ابعدي عن الناس السلبية اللي علي طول في شكوي صدقيني هيعدوكي في يوم و هتكوني زيهم ابعدي تماما عنهم لأن دول مهما حصل في حياتهم مش بيشوفو غير الوحش متخليهومش يمرضوكي زيهم

5. الصحة و الجسم : جسمك له حق عليكي طول مانتي مدياله حقه هتلاقي فرق كبير ظبطي اكلك اعملي تمارين هتساعدك جدا

6. عيوب : اكتبي عيوبك متبصيش بصة وحشة لنفسك بس الخطوة دي مهمة عشان في عيوب زي السم بتأذيكي و بتأذي الناس اللي حواليكي متسأليش حد لان الناس مش هتعرفك اكتر من نفسك

7. مستقبلك : الجزء ده بيختلف من شخص للتاني في ناس عايزة تسافر و شايفة مستقبلها فالشغل بالنسبة ليا الجزء ده مخصصاه للحياة الزوجية فيما بعد يعني عايزة بيتي يكون شكله ازاي اقرأ عن تربية الاطفال او المفروض اعمل ايه عشان حياتي ابقي راضية عنها بنسبة كبيرة #

3. التخطيط : شيلي من دماغك انك عايزة تعملي مليون حاجة في نفس الوقت هتحسي انك مضغوطة و كل حاجة دخلت في بعضها ، كفاية انك تحددي هدف و تقعدي المدة المتوسطة عشان تحققيه و تبقي راضية بالنتيجة متطوليش فالهدف عشان هتزهقي و لا تقللي عشان هتتشتتي ، امسكي الهدف و شوفي انتي عايزاه ليه اهميته ايه في حياته هيغير شكل حياتك ازاي

4. النية : لازم تحطي في بالك انك هتغيري كل حاجة افكارك و اسلوب حياتك و طريقتك هتغيري قناعاتك و مبادئك و سلوكك هيكون بيدل عليهم

5. ممنوعات : اعملي قوائم ممنوعات تحطي فيها حاجات جربتيها و ضرتك

6. روتين ايجابي : كلمة روتين ممكن تضايق البعض لكن في روتين يومي ايجابي لابد منه بمعني انك بتشغلي يومك بيه عشان تحسي انك عملتي حاجة في يومك مضاعش علي الفاضي زي الصلاة و القران و تمارين رياضية و في حاجات تانية كتيرة

7. التعلم : لازم قبل ما اليوم يخلص تطلعي منه بمعلومة كتاب قررتي تقريه تتفرجي علي افلام وثائقيه المهم تتعلمي ، القراءة بتخليكي تعيشي سنين معيشتهاش بتخليكي تشوفي الدنيا بشكل اصح بتزود ايمانك بدينك و بنفسك طول مانت مش عارفة مش هتعرفي قيمة الحياة

8. اكتبي : خصصي وقت في يومك لمذكراتك هاتي دفتر شكله جذاب اكتبي فيه كل اللي حصل في اليوم و علق معاكي اكتبي الحاجات اللي فرحتك بروزيها خليها تسيب اثر في قلبك

9. ادعم نفسك : كافئي نفسك لو عملتي انجاز صغير احتفلي بالطريقة اللي تحبيها ، حتي لو هتسجلي ريكورد لنفسك و تسمعيه من وقت للتاني عشان يحمسك

10. استمتعي : الحياة زي ما فيها جد زي ما فيها هزار و ضحك و استمتاع بالحياة اعملي كل اللي تحبيه عاملي نفسك كانك طفلة صغيرة شوفي بتحبي ايه و هيفرحك حتي لو حاجة بسيطة مثلا شيبسي أو شكل قلم عجبك و عايزة تجبيه دلعي نفسك

اخيرا .. عارفة اني طولت و متوقعتش اكتب كل ده بس انا فرحانة اني قدرت اوصل الكمية الكبيرة دي من مجهود اتمني افيد ناس كتيرة و اطلعهم من الخوف و الضلمة اللي جواهم انا جنب اي حد محتاج داعم أو صديق يشجعه علي ابسط حاجة ، لو حد عنده مشكلة و عايز نحلها سوا اتمني ميسكتش يقول و نفكر فيها ، لو استفدتو اتمني تدعولي بالدعوة اللي تحبوها ♥️
 
يمكنك أيضا مشاهدة المنتدى التاريخ
LAYLA OURABI فضفضة وتجارب واستفسارات 0

يمكنك أيضا مشاهدة