بالفيديو طريقة جديدة لعمل كرات اللحمة او الميت بالز على الطريقة الأمريكية

Somaia90

فتوكة جديدة
السلام عليكم
ازيكم يا فتوكات وحشتوني او ووحشتني فتكات كان بقالي فترة مادخلتش على المنتدى لغاية مابقتش عارفة ادخل على حسابي القديم بس الحمد لله رجعت لاحلى منتدى
النهارده عايزة اشارك معاكم وصفة بصراحة هو جوزي اللي عاملها وحبيت اشارك معاكم الوصفة عشان نشجعه يدخل المطبخ اكتر الوصفة دي من بلده يلا بينا نبدأ الوصفة :

فيديو الوصفة

المقادير:
كيلو لحمة مفرومة
كوباية جبنة رومي بالفلفل الأسود مبشورة
كوباية بقسماط مطحون
بيضة
بصلة
رأس توم
كوباية بقدونس مفروم
معلقة صغيرة ملح ومعلقة صغيرة فلفل اسود
معلقة ريحان ومعلقة زعتر واي توابل حسب الرغبة

الطريقة
نقطع البصل ونفرم التوم ونشوحهم في الزيت عشان طعم البصل والتوم يكون مش زاعق قوي في اللحمة عشان باقي المكونات طعمها يبان
نجيب بولة كبيرة ونحط اللحمة والبصل والتوم وكل المكونات مع بعض ونقلبها كويس بايدينا لغاية مع كل حاجة تتخلط مع بعض كويس اوي
نعمل كور متساوية الحجم ونبدأ نحمرها ونسويها في الطاسة
ملاحظة مهمة: نحاول نستخدم طاسة تيفال ومانحطش زيت خالص عشان اللحمة هتلزق وتفك مننا الافضل نكتفي بالدهون اللي في اللحمة.
ممكن نحط اللحمة في صينية ونسويها في الفرن لو مش عايزين نستخدم الطاسة
وبالهنا والشفا

في انتظار رأيكم وتشجيعكم لينا
 

يمكنك أيضا مشاهدة