جوزى معيشنى فى سعادة وهنا من ساعة ماحملت

المحتارة

فتوكة ونص
فتكات المحتارة
السلام عليكم

ههههههه لا الموضوع بالعكس
انا يا بنات متجوزة من 5 سنين وحملى حصل بعد 4 سنين الحمد لله
يعنى حمل عزيز مكنش فيه سبب معين لتأخر الحمل لكن ربك لما يريد بيحصل والحمل حصل لوحده بدون علاج ولا منشطات فالحمد لله

وبدل ما الواحد يفرح ويشكر ربنا لا ازاى يشيل الهم والنكد ويعدينى بيه
انا بكلمكم على جوزى اللى انا مش فاهمة بيعمل معايا كده ليه ده كان هيموت على الحمل اكتر منى انا مكنش فارق معايا كنت مفوضة امرى لربنا وعارفه ان كل حاجة بأوانها


من اول ما عرفت انى حامل لاقيت البوز امتد شبرين تلاتة وقعد يقولى خفى من المصاريف ومش عارفه ايه رغم انى وحياة ربنا مش مبذرة ولا حاجة ده انا بتكسف اطلب منه طلباتى

ومن فترة كتبت هنا فى المحتارة انه فضل مخاصمنى شهر ونص عشان اشتريت بالرينا ب 40 جنيه وفضلت الشهر ونص دول عند امى معبرنيش خاااااالص فيهم وفين وفين لما حن عليا وجيه خدنى بس ده بعد ما امى قالتله تعالى حل مشاكلك مع مراتك
لانه كان بيقولها تيجى تاخد حاجتها يعنى كل شوية يهددنا بالكلمة دى اصله شايف امى ست طيبة وانا ابويا متوفى الله رحمه

وبعد ما رجعت البيت كنت فى الشهر الرابع وقتها وفضلنا شهر كده كويسين ومرة وانا عند الدكتور فى ااخر الخامس كده الدكتور اكتشف ان ميه الجنين قلت وكتبلى على حقن وطلب منى اشعة ثلاثية الابعاد

لاقيت جوزى مش عاجبه الكلام قلتله نروح لدكتور تانى نتأكد راح معايا وهو متضرر والدكتور التانى قالى ملهاش لازمة الحقن يعنى عكس كلام الدكتور الاول خالص ورغم ذلك قال الميه فعلا قليلة

بقيت محتارة مش عارفه اخد الحقن ولا لأ فبعت ايميل لدكتور معظمكم عارفينه وكنت اصلا بتعالج عنده من سنتين بس محصلش نصيب فى الحمل معاه
وطلب منى اعمل دوبلر عشان نعرف الحبل السرى بيوصل الدم كويس للجنين ولا لا

وقلت لجوزى كده قعد يزعقلى ويقولى هو كل شوية هتروحى تعملى اشعة هو يعنى كل الحوامل بتعمل والدكتور ده ما شافش حاجة بعينه

قلتله طيب نروح لاى حد تانى مرضاش وقعد يزعق معايا وحلف عليا ما اخدش الحقن وكنا وقتها فى اول شهر رمضان وفضل مخاصمنى الشهر كله

ورجعت لدكتورى الاولانى لانى اصلا انا مرتاحه معاه وقالى اكمل الحقن عشان كمان وزن الجنين اقل من الطبيعى

ولما قلت لجوزى كده قالى ماليش دعوة بيكى ومش رايح معاكى فى حته

وفضلت اروح للدكتور كل اسبوع لوحدى وسعات ماما بتيجى معايا

صحيح كان بيسيب لى فلوس الكشف بس بعد ذل ومحايلة واستخسار

وطول شهر رمضان مقصرتش معاه كنت اكلمه يرد عليا بقرف او يزعق معايا بصوت عالى ويسمع بيا الجيران


** وفى حاجة حصلت فى نص شهر رمضان كنت هولع فى نفسى بسببه

قال ايه ابن اخوه اللى عنده 6 سنين صوباع ايده اتفتح وهو بيلعب خده وقعد يجرى بيه وكان شايل همه وراح بيه من مستشفى لمستشفى عشان يخيطه ومكبر الموضوع ومأفوره ويقول ده دخل العمليات ده انا معاه طول النهار دول عاوزين فلوس فى المستشفى رحت جبتها جرى ومع ذلك الولد ده ابوه وامه كانوا معاه

طبعا ربنا يشفى الولد بس اللى زعلنى ان جوزى المحترم شايل همه بزياده وانا واللى فى بطنى شوفوا بيعمل معانا ايه وحالتى خطر وربنا يستر والحمل يكمل على خير وهو ولا فى دماغه فاكرنى بدلع وربنا وحده اللى عالم بيا

ودخل علينا العيد وهو مخاصمنى برده ومكنش عاوزنى اروح عند امى بس انا من كتر خنقتى منه وحبستى فى البيت وهو طول النهار بره ومش بيجى غير على النوم صممت ورحت لماما وقعدت يومين العيد عندها اهو ارتاح من بوزه شويه

اه نسيت اقول انه اخر اسبوع فى رمضان اتخانق معايا تانى وقالى روحى قضى باقى الشهر والعيد عند امك بس انا اللى مرضتش اسيب البيت

وبطل كمان يجى ساعه الفطار وكنت بفطر لوحدى ومعرفش عنه حاجه
فعشان كده صممت اروح فى العيد لامى

ورجعت اخر يوم العيد البيت لوحدى وهو بقى نسى كل اللى عامله معايا ومش فاكرلى غير انى رحت لماما وهو مش راضى

وإلى الآن لسه مخاصمنى وبطل كمان ياكل فى البيت ومقاطعنى وكل شويه يتصل بماما يقولها تعالى خدى بنتك مش عاوزها تغور من هنا
والسبب انى بطلب منه يجيب لى الدواء والعلاج اللى باخده

وانا خلاص تعبت منه ومن تصرفاته مش عارفه بيعمل كده ليه معايا

واخر ما زهقت اتصلت باخته حكتلها على عمايله رغم انى علاقتنا مع بعض مش جامده قوى بس قلت اشهد اهله عليه لانه دايما مطلعنى قدامهم شكلى وحش ومش بسمع كلامه وعندية فعشان كده هما بيكرهونى
بس بصراحة الست معجبهاش الكلام وقالت هتكلمه
ومحصلش اى جديد من وقتها

هى على فكرة فعلا كلمته انا عارفه بس يعنى مش هتحكم عليه يكلمنى ويعاملنى كويس
يا بنات بجد انا قرفت منه ومن عيشته وعلى فكرة انا وهو على طول فى مشاكل من ساعه ما اتجوزنا وهو طبعه كده يفضل يخاصمنى بالشهر والاتنين ولما كنت اروح اصالحه وادلع عليه يسوء فى معاملته اكتر فبطلت اذل نفسى لواحد ما بيقدرش

وانا لو سبت البيت مش هستفاد حاجة ده بيتى انا ومن حقى وبيت اللى فى بطنى مش عاجبه يمشى هو ويريحنى

ده بدل ما يفرح معايا وندعى ربنا يكمل على خير ونستعد للولادة وبعد كده لو هنعمل سبوع او عقيقه لكن سادد نفسى ومش عارفه اخد قرار فى حاجة

مش مراعى حالتى النفسية وانى حامل وتعبانه كمان مشيلنى الهم والنكد

اعمل ايه شوفولى حل مع البنى آدم ده

والاهم من كل ده ادعولى من قلبكم اقوم بالسلامة والجنين يجى سليم معافى ويكون ذرية صالحة طيبة

واعذرونى لو كنت طولت عليكم
 

Mariam MOo

فتوكة ونص
اول حاجة يا قلبى ربنا يقومك بالسلامة ويتم ولادتك على خير ويجعل ابنك او بنتك الجاى يكون ذرية صالحة ليكى ياااارب ......تانى حاجه انا هقولك رأيى بصراحة ...انا لو منك اروح عند امى واقعد عندها ومتخليش امك تكلمه خااالص ولا تقوله تعال خد مراتك .....وتبدأى تدورى على شغل وبمجرد ما تولدى وتقومى بالسلامة وتتمى الاربعين تبدئى تشتغلى ...وتصرفى على نفسك وعلى ابنك او بنتك...ومتتطلبيش منو يجى فى ولادتك .....انا بقولك دا كلوا لمصلحة الطفل الى جاى فى الطريق مش عايزاه يتربى فى بيئة كلها مشاكل ويطلع معقد.....ونفس الوقت خليكى على زمته متخليهوش يطلقك ودا برضوا ابنك عشان يبقى فى فرصة ان ابنك يشوف ابوه ......ولما هو يشتاق لابنو يجى يشفوا فى بيت امك الى هو كان عمال يزن عليها عشان تاخدك.....ولو هو طلب منك انك ترجعى البيت ترجعى البيت بس بشروط....متخليهوش يهنيك ولا يعلى صوتو عليكى على الاخص قدام ابنك ......مشكلكم كلها تحلوها فى اوضة النوم بعيد عن ابنك تماما ......واى مشاكل ما بينكوا تتحل بالهدوء والمناقشة .....من غير زعيق وعصبية ....وتعرفيه انو لو قالك او قالك لامك تاخدك عندها انك هتروحى لامك ومش هترجعيلوا ولو عايز يشوف ابنو يجى يشوفه فى بيت امك .....خليكى قوية .....واوعى تضعفى ....انا والله مش عايزاكى تخسرى جوزك بس انا زعلانه على الطفل الى جاى فى الطريق مش عايزاه يطلع معقد بسبب مشاكلكوا....وكمان مش هاين عليا كرامتك الى رايحة بسببوا دى.......وهو لو بعتلك فلوس طول فترة قعادك مع مامتك خوديها دا حقك وحق ابنك.....وقولبلوا انك هتشتغلى .....مينفعش تشتغلى غير لما تعرفيه الاول ......ولو هو مرضيش قةليلةا طيب يبقى انت مطالب انك توفرلى كل احتياجاتى ....خليه يوفرلك مصروف شهرى متضمن فلوس الكشف وحقنك وكل حاجه تخصك ....وطبعا مصاريف ابنك بعد ما ييجى وكل الحاجات الضرورية...ودا برا مصروف البيت الى هو الاكل وغيروا ...بس متفتريش عليه يعنى ......انا قولتك الحل الى عندى ....انتى لازم تجازفى مينفعش تبقى عايشة مع واحد معدوش رغبة فى وجودك ....لدرجة انو يكلم امك ويقولها تعالى خدى بنتك....الموضوع كبير ولازم تحليه قبل ما تولدى .....فكرى دايما فى ابنك الى جاى ....ومتتنازليش عن نفسك وعن كرامتك عشان اى حد حتى لو كان ابنك لان انتى كدا بتضرى نفسك ثم بتضريه .......وحاولى تفكرى يمكن انتى عندك عاده بتدايقه او بتستفزه ...راجعى نفسك يمكن
 

يمكنك أيضا مشاهدة